ព័ត៌មានលម្អិតអំពីប្លក់

ជំនាញចលនារាងកាយ៖ តើទារកចាប់ផ្តើមក្រឡាប់ខ្លួននៅអាយុប៉ុន្មាន?

ក្នុងនាមជាឪពុកម្តាយ អ្នកប្រាកដជាមានចម្ងល់ជាច្រើនអំពីការវិវត្តនៃចលនារបស់កូនតូច។ តើកូនអាចក្រឡាប់ខ្លួននៅអាយុប៉ុន្មាន? តើគួរជួយកូនឱ្យក្រឡាប់ដោយរបៀបណា? តើកូនអាចចាប់កាន់វត្ថុបាននៅពេលណា? Babybio នឹងជួយបកស្រាយនូវរាល់ដំណាក់កាលសំខាន់ៗនៃការលូតលាស់ផ្នែកចលនារបស់ទារក!

តើទារកចាប់ផ្តើមក្រឡាប់ខ្លួននៅអាយុប៉ុន្មាន?

ក្នុងឆ្នាំដំបូង រៀងរាល់ថ្ងៃគឺជាឱកាសសម្រាប់ទារកក្នុងការរៀនសូត្រ និងទទួលបានជំនាញថ្មីៗ។ ការអាចក្រឡាប់ខ្លួនបានដោយខ្លួនឯង គឺជាដំណាក់កាលដ៏សំខាន់មួយនៃការលូតលាស់ផ្នែកចលនា។

អាយុដែលចាប់ផ្តើម៖ ជាទូទៅ ទារកអាចក្រឡាប់ខ្លួនបាននៅអាយុប្រហែល ៤ ទៅ ៦ ខែ។តម្រូវការ៖ កូនត្រូវមានកម្លាំងសាច់ដុំគ្រប់គ្រាន់ដើម្បីធ្វើចលនានេះ។

ចំណាំ៖ ទារកនីមួយៗមានល្បឿនលូតលាស់ខុសៗគ្នា ប្រសិនបើកូនមិនទាន់អាចធ្វើបានតាមវ័យកំណត់ ក៏កុំបារម្ភអី ប៉ុន្តែអ្នកអាចពិភាក្សាជាមួយគ្រូពេទ្យកុមារដើម្បីពិនិត្យបន្ថែម។

ដំណាក់កាលសំខាន់ៗនៃការក្រឡាប់ខ្លួន

ភាគច្រើន ទារកនឹងចាប់ផ្តើមក្រឡាប់ពី "ខ្នងមកពោះ" ជាមុនសិន។ បន្ទាប់ពីអនុវត្តបានស្ទាត់ជំនាញ ទើបពួកគេចាប់ផ្តើមរៀនក្រឡាប់ពី "ពោះមកខ្នង" វិញ ដែលជាចលនាស្មុគស្មាញជាងបន្តិច។ ការក្រឡាប់ខ្លួននេះ ជួយពង្រឹងសាច់ដុំឱ្យរឹងមាំ ដើម្បីត្រៀមខ្លួនសម្រាប់ដំណាក់កាលអង្គុយ (ប្រហែលអាយុ ៦ ខែ) និងការវារ ឬដើរនៅខែបន្តបន្ទាប់។

តើត្រូវជួយទារកឱ្យក្រឡាប់ខ្លួនដោយរបៀបណា?

ការក្រឡាប់ខ្លួនលើកដំបូងច្រើនតែកើតឡើងដោយចៃដន្យ នៅពេលទារកព្យាយាមឈោងចាប់វត្ថុអ្វីមួយ។ អ្នកអាចជួយជម្រុញកូនបានតាមវិធីដូចខាងក្រោម៖

• ការហាត់ដេកផ្កាប់ (Tummy Time)៖ ក្នុងខែដំបូងៗ គួរដាក់ឱ្យកូនដេកផ្កាប់លើពោះយូរៗម្តង (ពេលប្តូរខោអាវ)។ នៅអាយុ ៣-៤ ខែ គួរដាក់កូនឱ្យដេកផ្កាប់រយៈពេលប៉ុន្មាននាទីនៅពេលគេភ្ញាក់ ដើម្បីពង្រឹងសាច់ដុំក ក្បាល និងខ្នង។
• លំហាត់ប្រាណស្រាលៗ៖ ជួយធ្វើចលនាជើងកូនថ្នមៗ (ដូចជាបត់ជើងទៅជិតទ្រូង ហើយបង្វិលចុះឡើង) ដើម្បីឱ្យកូនស៊ាំនឹងចលនាបង្វិលខ្លួន។
• ការលើកទឹកចិត្ត៖ ដាក់វត្ថុដែលមានពណ៌ស្រស់ៗនៅចម្ងាយបន្តិចពីកូន ដើម្បីឱ្យកូនព្យាយាមក្រឡាប់ខ្លួនទៅចាប់។
• ចំណុចប្រុងប្រយ័ត្ន៖ នៅពេលកូនអាយុ ៤-៥ ខែ មិនគួរជួយទប់ខ្នង ឬចាប់ដៃឱ្យកូនក្រឡាប់ពេកទេ ដើម្បីឱ្យកូនរៀនធ្វើដោយខ្លួនឯង និងបង្កើតទំនុកចិត្ត។

សំខាន់៖ ប្រសិនបើកូនអាយុ ៦-៧ ខែហើយ នៅតែមិនទាន់អាចក្រឡាប់ខ្លួនបាន គួរពិគ្រោះគ្រូពេទ្យទារក ដើម្បីពិនិត្យ និងណែនាំការលូតលាស់លើចលនារបស់គាត់។

ការវិវត្តនៃជំនាញផ្សេងៗទៀត

តើទារកចាប់វត្ថុបាននៅអាយុប៉ុន្មាន?

• ពេលទើបកើត៖ ទារកមានមានប្រតិកម្មចាប់ (Grasping reflex) ដោយស្វ័យប្រវត្តិ ប៉ុន្តែមិនមែនជាការចាប់ដោយចេតនាទេ។

• អាយុ ៣-៤ ខែ៖ ចាប់ផ្តើមឈោងចាប់វត្ថុនៅជិតខ្លួន (ដូចជាដបទឹកដោះគោ)។

• អាយុ ៨-១២ ខែ៖ អាចចាប់កាន់វត្ថុបានយ៉ាងស្ទាត់ជំនាញ និងពេញលេញ។

ការគ្រប់គ្រងចលនាក្បាល

• ពេលទើបកើត៖ សាច់ដុំកនៅទន់ មិនទាន់អាចទ្រក្បាលបាន។

• អាយុ ២ ខែ៖ ចាប់ផ្តើមលើកក្បាលបានបន្តិចម្តងៗ។

• អាយុ ៤ ខែ៖ សាច់ដុំក និងខ្នងរឹងមាំគ្រប់គ្រាន់ដើម្បីគ្រប់គ្រងក្បាលបានល្អនៅពេលអង្គុយ។

• ទោះជាយ៉ាងណា ទារកនីមួយៗមានល្បឿនលូតលាស់ខុសៗគ្នា។

សូមរក្សាទុក និងអនុវត្តបទបញ្ជា Babybio សម្រាប់ការលូតលាស់ និងជំនាញចលនារបស់ទារកបានល្អ!