ព័ត៌មានលម្អិតអំពីប្លក់

ការណែនាំអំឡុងពេលទារកយំ

ការយំរបស់ទារក៖ គន្លឹះយល់ដឹង និងវិធីសាស្ត្រដោះស្រាយដ៏មានប្រសិទ្ធភាព

ការយំរបស់ទារក គឺជាប្រភពនៃក្តីបារម្ភចម្បងមួយសម្រាប់ប៉ាម៉ាក់វ័យក្មេង។ តើអ្នកកំពុងជួបការលំបាកក្នុងការស្វែងយល់ពីអត្ថន័យនៃការយំរបស់កូនមែនទេ? តើអ្នកមានអារម្មណ៍ថាកូនរបស់អ្នកយំខ្លាំងពេកឬទេ? អ្នកជំនាញរបស់ Babybio នឹងជួយបកស្រាយពីមូលហេតុដែលកូនរបស់អ្នកយំ និងផ្តល់វិធីសាស្ត្រដើម្បីជួយឱ្យស្ថានភាពនេះកាន់តែប្រសើរឡើង។

ហេតុអ្វីបានជាទារកយំ?

ដោយសារទារកមិនទាន់អាចនិយាយបាន ការយំគឺជា "ភាសាតែមួយគត់" ដែលពួកគេប្រើដើម្បីបញ្ចេញអារម្មណ៍ និងតម្រូវការ។ វាគឺជាមធ្យោបាយបង្ហាញថាពួកគេកំពុងឃ្លាន ឈឺ ឬមានអារម្មណ៍ធុញទ្រាន់។ ការយំគឺជាទម្រង់នៃការប្រាស្រ័យទាក់ទងដ៏សំខាន់រវាងទារក និងឪពុកម្តាយ។

តាមធម្មជាតិ ការយំនឹងមានភាពញឹកញាប់ និងខ្លាំងក្លានៅក្នុងអំឡុង ៣ ខែដំបូង ហើយនឹងកើនឡើងដល់កម្រិតខ្ពស់បំផុតនៅចន្លោះសប្តាហ៍ទី ៦ ដល់ទី ៨ (ប្រហែល ២ ទៅ ៣ ម៉ោងក្នុងមួយថ្ងៃ) បន្ទាប់មកនឹងថយចុះវិញនៅសប្តាហ៍ទី ១២។ ទារកជាច្រើនយំញឹកញាប់ណាស់ក្នុងអំឡុងឆ្នាំដំបូង ឬសូម្បីតែឆ្នាំទីពីររបស់ពួកគេ។ គ្រូពេទ្យកុមារចាត់ទុកថាការយំគឺជាផ្នែកមួយនៃការលូតលាស់ធម្មតា ព្រោះកុមារដែលមិនយំសោះអាចជាសញ្ញាគួរឱ្យព្រួយបារម្ភជាងកុមារដែលយំច្រើន។

មូលហេតុចម្បងៗនៃការយំរបស់ទារក

ទោះបីជាការយំជារឿងធម្មតា ប៉ុន្តែវាតែងតែមានមូលហេតុបង្កប់នៅពីក្រោយជានិច្ច៖

• ទារកឃ្លាន៖ ទារកភាគច្រើនយំភ្លាមៗនៅពេលមានអារម្មណ៍ឃ្លាន ឬស្រេកទឹក។ ការយំនេះអាចកើតឡើងក្រោយពេលបៅរួច (ករណីបៅមិនឆ្អែត) ឬបន្ទាប់ពីអាក់ខានបៅរយៈពេល ២ ទៅ ៣ ម៉ោង។ 

• ទារកមានបញ្ហារំលាយអាហារ: របបអាហារដែលមិនស័ក្តិសមអាចបង្កជាបញ្ហាមិនស្រួលក្នុងពោះ ដូចជាហើមពោះ ឆ្អល់ពោះ ឬមានឧស្ម័នច្រើន។

• ទារកងងុយគេង: នៅពេលអស់កម្លាំងខ្លាំង ទារកងាយនឹងយំរករឿង ប៉ាម៉ាក់គួរដាក់កូនឱ្យគេងក្នុងបរិយាកាសស្ងប់ស្ងាត់ភ្លាមៗ នោះពួកគេនឹងគេងលក់បានលឿន។

• ភាពមិនស្រួលខ្លួន៖ ដូចជាកន្ទបកខ្វក់ (គួរពិនិត្យប្តូរកន្ទប ៦-១០ ដងក្នុងមួយថ្ងៃ) ឬការដាក់កូនឱ្យគេងក្នុងទីតាំងដែលមិនស្រណុកខ្លួន។

• ទារកស្ថិតនៅក្នុងទីតាំងមិនស្រួល: ទារកដែលត្រូវបានដាក់នៅលើគ្រែ ឬអង្រឹងក្នុងទីតាំងមិនស្រួលក៏អាចចាប់ផ្តើមយំផងដែរ។ ពិចារណាលើចំណុចនេះ ប្រសិនបើអ្នកកំពុងពិបាករកមូលហេតុនៃការយំរបស់ទារក។

• ទារកឈឺចាប់នៅកន្លែងណាមួយ ឬក្តៅខ្លួន៖ ការឈឺក្បាល ដុះធ្មេញ ឬការឈឺចាប់ក្នុងពោះ។ ក្នុងករណីកូនក្តៅខ្លួនខ្លាំង ឬយំខុសប្លែកពីធម្មតា សូមប្រញាប់ពិគ្រោះជាមួយគ្រូពេទ្យកុមារ។

• ត្រូវការការលួងលោម៖ រហូតដល់អាយុ ៣ ឆ្នាំ កុមារត្រូវការមានអារម្មណ៍ថាទទួលបានក្តីស្រឡាញ់ និងការបីត្រកងពីឪពុកម្តាយ។ នេះជាមូលហេតុដែលពួកគេយំភ្លាមនៅពេលអ្នកដាក់ពួកគេចុះ។

ហេតុអ្វីបានជាទារកយំពេលកំពុងគេង?

រហូតដល់អាយុ ៤ ទៅ ៦ ខែ ទារកមិនទាន់អាចបែងចែករវាងពេលថ្ងៃ និងពេលយប់បានច្បាស់លាស់នៅឡើយ។ បន្ទាប់ពីអាយុនេះ ការយំនៅពេលយប់អាចបណ្តាលមកពីទារកឃ្លាន ឬតម្រូវការចង់បានភាពកក់ក្តៅ ឬភាពស្ងប់ស្ងាត់។

របៀបលួងលោមទារកដែលកំពុងយំ

នៅពេលអ្នកមិនអាចរកមូលហេតុឃើញច្បាស់លាស់ អ្ន​កអាចសាកល្បងវិធីសាស្ត្រទាំងនេះ៖

• ការបី និងការនិយាយ៖ បីកូននៅក្នុងរង្វង់ដៃ អង្រួនថ្នមៗ និងនិយាយលួងលោមដោយសំឡេងស្រទន់។

• ចលនាលំយោល៖ ការដើរយឺតៗដោយមានចលនាលំយោលតិចៗ ជួយឱ្យទារកមានអារម្មណ៍កក់ក្តៅ។

• ការប៉ះ និងម៉ាស្សា៖ ថើបថ្ពាល់ ប៉ះជើង ឬម៉ាស្សាពោះថ្នមៗ (ពិសេសក្នុងករណីកូនហើមពោះ ឬឆ្អល់ពោះ)។

តើយើងគួរទុកឱ្យទារកយំដែរឬទេ?

អ្នកជំនាញផ្នែកកុមារតូចៗនាពេលបច្ចុប្បន្ន មិនណែនាំឱ្យទុកកូនចោលឱ្យយំឡើយ។ ការឆ្លើយតប និងការលួងលោមភ្លាមៗ គឺជាគន្លឹះក្នុងការបង្កើត "ទំនាក់ទំនង" និងធ្វើឱ្យកូនមានអារម្មណ៍ថាមានសុវត្ថិភាពបំផុត។