ព័ត៌មានលម្អិតអំពីប្លក់

ការណែនាំអំពីការផ្តាច់ដោះ

ការផ្តាច់ដោះទារក៖ គន្លឹះដើម្បីផ្លាស់ប្តូរទៅបៅដបដោយភាពងាយស្រួល

ការសម្រេចចិត្តឈប់បំបៅដោះកូន មិនថាដោយសារស្ថានភាពការងារ ឬតម្រូវការផ្ទាល់ខ្លួនឡើយ វាគឺជាដំណាក់កាលអន្តរកាលដ៏សំខាន់ដែលទាមទារនូវក្ដីស្រឡាញ់ ភាពអត់ធ្មត់ និងពេលវេលា។ ការផ្តាច់ដោះគួរតែធ្វើឡើងបន្តិចម្តងៗ ដើម្បីឱ្យទាំងអ្នកម៉ាក់ និងកូនតូចអាចសម្របខ្លួនបានតាមធម្មជាតិ។

១. យុទ្ធសាស្ត្រ "ជំនួសដោយដប" បន្តិចម្តងៗ

វិធីដែលល្អបំផុតដើម្បីផ្តាច់ដោះដោយមិនឱ្យកូនមានអារម្មណ៍បាត់បង់ភ្លាមៗ គឺការកាត់បន្ថយការបំបៅដោះម្តាយម្តងមួយពេល រៀងរាល់ ២ ទៅ ៣ ថ្ងៃម្តង៖

• ចាប់ផ្តើមនៅពេលរសៀល៖ គួរជំនួសការបំបៅដោះនៅចុងរសៀលដោយការបៅដបវិញមុនគេ។

• ការបំបៅចម្រុះ (Mixed Feeding)៖ ការប្តូរមកបៅដបឆ្លាស់គ្នាជាមួយការបំបៅដោះម្តាយ ជួយរក្សាចំណងមេត្រីភាពឱ្យនៅបន្តបានយូរ និងជួយឱ្យរាងកាយអ្នកម៉ាក់កាត់បន្ថយការផលិតទឹកដោះដោយស្វ័យប្រវត្តិ ដែលជួយចៀសវាងការឈឺតឹងសុដន់។

• ប្រើទឹកដោះម្តាយក្នុងដប៖ ប្រសិនបើអាច អ្នកម៉ាក់គួរច្របាច់ទឹកដោះទុកក្នុងដបឱ្យកូនបៅ ដើម្បីឱ្យកូនស៊ាំនឹងក្បាលដោះជ័របន្តិចម្តងៗ ដោយមិនបាត់បង់រសជាតិទឹកដោះដែលគេធ្លាប់ញ៉ាំ។

២. ៦ គន្លឹះជួយឱ្យទារកងាយទទួលយកដបទឹកដោះគោ

ជួនកាលកូនអាចនឹងរករឿង ឬបដិសេធដបទឹកដោះគោ ព្រោះគេនៅចង់បៅដោះម្តាយ។ សូមសាកល្បងវិធីសាស្ត្រខាងក្រោម៖

1. រក្សាភាពស្ងប់ស្ងាត់៖ ព្យាយាមឱ្យកូនបៅដបក្នុងចិត្តដែលត្រជាក់ និងមិនបង្ខំ។

2. ការនិយាយពន្យល់៖ ទោះបីគេមិនទាន់ចេះនិយាយ ប៉ុន្តែការនិយាយលួងលោមក្នុងសំឡេងស្រទន់ នឹងជួយឱ្យកូនមានអារម្មណ៍កក់ក្ដៅ និងយល់ពីការផ្លាស់ប្តូរ។

3. ផ្លាស់ប្តូរបរិយាកាស៖ ជៀសវាងការឱ្យកូនបៅដបក្នុងទីតាំង ឬកៅអីដែលអ្នកធ្លាប់អង្គុយបំបៅដោះគេ ដើម្បីកុំឱ្យកូននឹកឃើញចង់បៅដោះ។

4. ប្រើតន្ត្រីជួយបន្លប់៖ ការបើកតន្ត្រី ឬច្រៀងចម្រៀងបំពេ អាចជួយឱ្យកូនមានអារម្មណ៍រីករាយ និងភ្លេចការរករឿងបៅដោះ។

5. ប្រគល់ភារកិច្ចឱ្យប៉ា ឬសាច់ញាតិ៖ ឱ្យអ្នកផ្សេងជាអ្នកកាន់ដបទឹកដោះគោឱ្យកូនបៅជំនួសអ្នកម៉ាក់ ហើយអ្នកម៉ាក់គួរដើរចេញពីបន្ទប់មួយរយៈ ដើម្បីកុំឱ្យកូនធំក្លិនខ្លួនអ្នកម៉ាក់ រួចចង់បៅដោះ។

6. ជ្រើសរើសក្បាលដោះឱ្យបានត្រឹមត្រូវ៖ ប្រសិនបើកូនមិនព្រមបៅ សាកល្បងដូរក្បាលដោះថ្មី។ គួរជ្រើសរើស "ក្បាលដោះ Physiological teats" ដែលមានរូបរាង និងការយឺតស្រដៀងនឹងសុដន់ម្តាយបំផុត។

ការផ្តាច់ដោះគឺជាបញ្ហាផ្ទាល់ខ្លួនរបស់គ្រួសារនីមួយៗ។ សូមកុំបារម្ភ ចំណងមេត្រីភាពដែលអ្នកបានសាងឡើងក្នុងអំឡុងពេលបំបៅដោះកូន វានឹងមិនបាត់បង់ឡើយ តែវានឹងវិវត្តទៅរកភាពស្និទ្ធស្នាលតាមបែបបទថ្មី។